बागलुङ । गत मंसिर ४ गते भएको निर्वाचनमा बागलुङ निर्वाचन क्षेत्र न १ बाट विजयी भएका राष्ट्रिय जनमोर्चाका अध्यक्ष चित्रबहादुर केसीले चुनावी खर्च विवरण सार्वजनिक गरेका छन । आइतबार बागलुङमा पत्रकार सम्मेलन गरि निर्वाचनमा १८ लाख १४ हजार रुपैयाँ खर्च भएको संघीय सांसद केसीका निर्वाचन प्रतिनिधि थानेश्वर सुवेदीले बताए ।
निर्वाचन प्रचारप्रसारका क्रममा सवारी साधन भाडा तथा इन्धनमा ८ लाख ६० हजार, प्रतिनिधि परिचालन खर्चमा २ लाख ५० हजार, कार्यालय सञ्चालनमा २ लाख, मतदाता नामावली खरिद, छपाई र फोटोकपीमा ९० हजार रुपैयाँ खर्च भएको पत्रकार सम्मेलन उल्लेख गरियो ।
त्यस्तै सामाग्री ढुवानीमा २० हजार, विद्युतिय तथा छापा प्रचार प्रसारमा ४० हजार, सामाजिक सञ्जालमा १० हजार र बिबिध तर्फ १ लाख ३४ हजार रुपैयाँ गरि १८ लाख १४ हजार खर्च भएको उल्लेख छ ।
निर्वाचन ऐन २०७४ को दफा ७२ र निर्वाचन निर्देशिका २०७९को दफा ८० बमोजिम केसीले खर्च विवरण निर्वाचन आयोगमा बुझाएका छन । केसीले गत मंसिरमा भएको निर्वाचनमा २१ हजार ४५१ मत ल्याएर विजयी भएका थिए ।
