पोखरा । गण्डकी प्रदेशका नवनियुुक्त मुख्यमन्त्री सुरेन्द्रराज पाण्डेले वैशाख २१ गते विश्वासको मत लिने भएका छन् । मुख्यमन्त्री पाण्डेले २१ गते आफूले विश्वासको मत लिने तयारी गरेका हुन।
मन्त्रालय भागबण्डा नटुगिंएपछि मुख्यमन्त्री पाण्डेले विश्वासको मत लिएरमात्रै मन्त्रिपरिषद् विस्तार गर्ने तयारी गरेका हुन् । नेपाली कांग्रेस, माओवादी केन्द्र र एकीकृत समाजवादीको समर्थनमा संविधानको धारा १६८ को उपधारा २ बमोजिम गत बिहीबार पाण्डे मुख्यमन्त्री नियुक्त भएका थिए ।
मन्त्रिपरिषद् बैठकले वैशाख २१ गते प्रदेशसभा अधिवेशन बोलाउन प्रदेश प्रमुख पृथ्वीमान गुरुङ समक्ष सिफारिस गरेको थियो । उक्त सिफारिस अनुसार प्रदेश प्रमुख गुरुङले २१ वैशाखको दिउँसो २ बजे प्रदेशसभाको अधिवेशन आह्वान गरेका छन् ।
